Shtesa për shfletues
Shtesa për Chrome ta sjell kontrollin gjuhësor të Shkrimorit në çdo fushë teksti në internet. Bashkë me të vijnë Sinonimiku, Fjalori i madh dhe Lexuesi.
Me shtesën për shfletues, Shkrimori të shoqëron kudo që shkruan në internet: në email, në rrjetet sociale, në formularë e komente. Për momentin shtesa ofrohet vetëm për Chrome; mbështetja për shfletues të tjerë vjen më vonë. E gjen te faqja e shkarkimeve.
Kontrolli gjatë shkrimit
Sapo fillon të shkruash në një fushë teksti, shtesa e kontrollon tekstin menjëherë. Në cep të fushës del një shenjë e vogël. Klikoje dhe hapet paneli lundrues i Shkrimorit, një dritare që mund ta zhvendosësh dhe t’ia ndryshosh madhësinë si të duash. Aty i ke kartat e kontrollit gjuhësor me gjetjet e radhitura, Sinonimikun, kartën e Fjalorit të madh dhe Lexuesin.
Mjetet e përzgjedhjes
Shtesa të ndihmon edhe jashtë fushave të tekstit. Kur përzgjedh diçka në një faqe, del një flluskë me dy butona. “Lexo” ta lexon tekstin me zë përmes Lexuesit. “Fjalori” e kërkon fjalën në Fjalorin e madh dhe e hap në panelin anësor të shfletuesit; ky punon vetëm kur ke përzgjedhur një fjalë të vetme, pikërisht në formën që gjendet në fjalor.
Cilësimet e shtesës
- Çelësi kryesor në dritaren e shtesës e ndez ose e fik tërësisht.
- Me çelësat për faqe të veçanta e çaktivizon vetëm në faqet ku nuk e do.
- Te “Mjetet e përzgjedhjes” cakton nëse do të shfaqet flluska kur përzgjedh tekst.
Në aplikacionet tona shtesa tërhiqet vetë dhe shfaq mesazhin “Kjo faqe e ka Shkrimorin e vet”. Aty kontrolli gjuhësor është tashmë i integruar, prandaj shtesa nuk nevojitet.